史特加殲「迪」賀會長70大壽

Edwin622

29/07/2010
文： 亨格比利

歐霸盃第3圈外圍賽激戰連場，剛捧走烏倫盃嘅史特加雖然未齊腳，但一眾戰將經過連日嚟嘅操練之後狀態急升，今晚造訪戰鬥力平平嘅莫迪可睇高一線，捧1.53倍客W賀史特加會長文費特70歲大壽！（開賽時間：周五凌晨1:00）


古斯曼奴域歸隊鬥莫迪


德甲未開咧，史特加惟有頻頻踢友賽提升狀態，早排佢哋就接連擊敗川迪同年青人捧走烏倫盃，及後仲急急腳返德國開操，務求盡快操起狀態。喺世盃一炮而紅嘅基迪拉同皇馬傾緊轉會，今戰未必披甲，不過古斯曼奴域同波卡等世盃戰將已經歸隊，加埋普格恩耶克、馬利卡都會悉數上陣，戰鬥力有保證。




另外，史特加前日任命名將波碧做體育總監，當日更加係會長文費特70歲牛一，全隊上下賽前講到明，希望擊敗莫迪作為文費特嘅生日禮物，戰意唔需要懷疑。對家莫迪今季喺挪超排中游，上一圈對住拉脫維亞嘅謝爾加華只能夠靠作客入球優惠晉級，加上後衞史坦同前鋒柏比迪奧夫仲養緊傷，根本冇本錢同史特加鍊。