馬略卡3千球迷示威

Edwin622

29/07/2010


馬略卡因財政問題被逐出歐霸盃一事愈搞愈大！馬略卡股東之一嘅網壇巨星拿度（下圖）尋日出面炮轟歐洲足協處事不公，暗指負債更嚴重嘅巴塞隆拿亦應該禁踢歐聯，至於約3,000名馬略卡球迷更於今晨示威，抗議歐洲足協主席柏天尼「打茅波」！




據西班牙《阿斯報》消息，警方證實有約3,000球迷拉起「請歐洲足協維持公平競技」橫額，抗議歐洲足協取消馬略卡參加今屆歐霸盃嘅資格，矛頭直指柏天尼、西班牙足總主席韋拿，甚至取代參賽嘅維拉利爾亦被炮轟，連發起人都話冇諗過有咁多球迷參與呢次示威行動。


拿度：應該禁埋巴塞


馬略卡嘅支持者聲勢浩大，早前注資入球會成為股東嘅網壇「一哥」拿度，尋日亦加入聲討行列，佢向西班牙IB3電視台表示：「如果禁賽原因係出自財困，咁不如取消歐洲賽啦，事關幾乎每間球會都有類似問題，我哋應該得到公平待遇。」




上季聯賽冠軍巴塞隆拿目前負債達5億歐元，比馬略卡高出近10倍，歐洲足協反視若無睹，難怪拿度會咁不滿啦！歐洲足協星期五將處理馬略卡嘅上訴，雖然未知可唔可以翻案，球隊依然做足準備，尋日宣布簽入飛燕諾中場約拿芬迪根斯文增強實力。